மறு பிறப்பு

எப்படியடி
இந்த ரசாயன மாற்றம்?

இன்று என் சுவாசம் எங்கும்
உன் சந்தன வாசம்
என் வியர்வையிலும்
உன் சுந்தர முகம்

அன்று
மோகத்தின் உச்சத்தில்
உன் சந்திர வதனத்தின்
ஒவ்வொரு செல்லிலும்
நட்சத்திர மின்னல்கள்;
அக் கோடி மின்னல்களில்
என் இமை பொசுங்க
நிலைத்த பார்வையில்
கிடைத்தது
சொர்க்க தரிசனம்


உள்ளே புகுந்த
ஒளிப் பிரவாகத்தில்
எனக்குத் தேவனின் உடல்.


பிறப்புக்கு முந்தைய
இன்மையில்
நிலைத்தோம்;
மீண்டும் பிறக்க மறுக்கிறது
பேதை மனம்.


பிறக்கவா?
இறந்து இறந்து
பிறக்க வா!